Azərbaycan Nəqliyyat Nazirliyində Bakı Beynəlxalq Dəniz Ticarət Limanının Ələtə köçürülməsi üçün yaradılmış Azərbaycan və Koreya mütəxəssislərindən ibarət işçi qruplarının dördüncü görüşü keçirilib. Bu barədə açıqlamasında Azərbaycan işçi qrupunun rəhbəri, Nəqliyyat Nazirliyinin nəqliyyat siyasəti və iqtisadiyyat şöbəsinin müdiri Sədrəddin Məmmədov məlumat verib. S.Məmmədovun sözlərinə görə, iclasda limanın köçürülməsi ilə bağlı bir sıra məsələlər, o cümlədən, layihələndirmə işlərinin gedişi müzakirə olunub: «İşçi qrupu tərəfindən işlər planlaşdırılmış qaydada gedir. Noyabr ayının ortalarınadək limanın xəritə üzərində koordinatlarının müəyyənləşdiriləcəyi gözlənilir».
   Qeyd edək ki, sentyabrın 3-də Koreyanın «GS Engineering & Construction» şirkəti Ələt qəsəbəsində yeni dəniz limanının tikintisi layihəsinin sonuncu versiyasını Nəqliyyat Nazirliyinə təqdim edib. Dəniz limanının köçürülməsi 3 mərhələdə həyata keçiriləcək. Birinci mərhələ 2008-2011-ci, ikinci mərhələ 2011-2013-cü, üçüncü mərhələ isə 2013-2015-ci illəri əhatə edəcək. İlkin qiymətləndirmələrə əsasən, Ələtdə yeni dəniz limanının tikintisi 396 mln. ABŞ dollarına başa gələ bilər. Limanda 11 yanalma körpüsü olacaq ki, bunun da 6-sı birinci mərhələdə, yəni 2008-2011-ci illərdə tikiləcək. Dünya standartlarına cavab verəcək yeni liman 2015-ci ildə 11,6 mln. ton yük qəbul etmə